من الحب ما قتل

كتب: جعفر عباس

.

عندي صاحبي كدا إسمو تاج السر بتابع التطبيقات والحاجات دي ،داخل ليهو في شخصيه كدا يقول ليك كنا في (الإنستغرام) ( التقول كان في روما وما عارف الإسناب فيهو شنو، والتيك توك الليلة مولع وادخل لي في الماسنجر والقصص دي
قام حكي ليهو موقف كدا لي جعفر صاحبنا دا، جعفر دا كمان كان داير تذيع ليك خبر بس كلمو ….!!
جا شايلو لي من نارو ميت من الضحك قال لي حصل موقف مع ( تاج السر ) حكاهو لي لكن قال لي ما تكلم بيهو زول، قلت ليهو أنا ما زول؟ قال لي إنت ما حبيبنا ياخ، طبعاً بكون أنا الحبيب الطمنطاشر ، المهم القصة إنو ( تاج السر ) دا قال ليهو إنو دخل ليهو في تطبيق كدا اسمو ( clubhouse ) بتلاقو فيهو أصدقاء كدا زي ( فيس بوك ) و( تويتر لكن دا بالصوت بكونو كلهم سامعين بعض وبتناقشو في موضوعات كتيره في ناس في المنصة وناس جمهوور وكلام زي دا وكلهم طبعاً سامعين بعض ، المهم زولك سمع بيهو طوالي عجبو الإسم نزلو ليك وجا منقشط، لقى غرفة دردشة كدا فيها موضوع عن ( أغاني الحقيبه )
جا خاشي طوالي ولقى صور الناس دي معلقا ودخل …!!كان في أغنيه شغالة والناس دي بتسمع في الاغنيه عشان تتناقش بعدها ….!الناس البديرو الحوار ديل مراتٍ بدوك فرصة تطلع في المنصة الافتراضية دي ممكن تتكلم بدل تكون مستمع بس …
المهم بدوس في الحاحات كدا ويجوط لقى نفسو مع الناس الفوق البتكلمو ديل كشف كداااا …لقي بت جيرانهم اسمها ( بهجة ) قااااعدة محكرة ( طبعا كل زول صورتو معلقا )
قال لي جعفر هو أصلًا مكسر فيها من زمان بس مالاقي معاها فرصة …!!يازول أول ما شافها شبكا ليك ….بهجه ازيك …!! كيف …!!قايلا هي بس البتسمعو طبعا إتحرجت قدام الناس قالت ليهو أهلا يا تاج السر وزولك طبعا أول يوم ترد عليهو ذاتو ما دق قال ليها دا أحلى ( تطبيق ) اللمانا سوا دا ، تسمع لمان تقول عقدو ، والبت دايره تموت من الإحراج ….قالت ليهو أيوا دا تطبيق بجمع كل الناس يا تاج السر زي ما شايف ….عشان يفهم ( هو تاني بشوف) قال ليها إنتى ( السر ) دي ما تشيلها برا يا ( بهجة ) قولي لي يا تاج ) ساكت كدا حاف …!!طبعاً صبت فيها المطرة ….!! ( في زي ( خمسة واربعين ) نفر كدا قاعدين وسامعين بوضوح ومتابعين الونسة الدقاقة دي ، وهم الغتيتين شعرو إنو الزول دا طاشي ما عارف هو وين وبعمل في شنو المهم كتمو النفس والضحك كاتلم …!!

(وصاحبنا واصل:) والله يا بهجة الليله وكت اديتيني الفرصة دي براك معناها مزاجك هادي وأنا حاقول ليك ….!!( بهجة ) خلاص دايره تموت قالت ليهو لكن يا ( التاج ) إنت فاهم غلط الحتة دي فيها ناس كتار ما أنا براي قال ليها ما مشكله زحى منهم …قالت ليهو يا ( تاج السر ) إنت على الهوا قال ليهو والله نحن الهوى شالنا عدييييل كدا، والغريبة أصلو ماكنت عارفك بي جاي.. الضغط تخطى عتبة ال1000 ، قالت ليه آيوا بي جاي ..إنت جاي دي عارفا وين يا محترم ….!؟؟؟ قال ايها ما مهم المهم إني معاك …!!

( بعد دا الإسعاف بس)
…
قالت ليهو يا ( تاج السر ) الناس دي كلها بتسمع فيك ما بالغت لكن ولا جايب خبر قال ليها أنا أتمني الدنيا دي كلها
تسمعني …!! أنا يا ( بهجة ) من زمان داير اقول ليك الكلام
دا وكويس لميت فيك الليله في ( الماسنجر ) دا ، قالت ليهو دا ما ( ماسنجر ) يمسجر قلبك على مصارينك يا تاج السر …دا تطبيق جماعي يجمعن فيك كلاب الحلة شحدتا ربي لكن كان اخليك يا رمة الله ينعلني يا عواليق ….!!بهجة تنازلت عن كل ( برستيجها ) ومن النوع البتكلم عن ( الثنايا ) والغسق والتداعي والحاجات دي ….وطارحة نفسها شاعرة كدا في
( القروب ) سامنها ( فاكهة ) القروب
الليلة تاج السر ( حنضلا ) عليها …

في واحد كدا من المتابعين خلاص ما قدر يكتم وفكا ليك الضحكة ، تاج السر قال ليها دا منو الجنبك دا سامع لي صوت …؟؟؟؟ طوالي عملت ( خروج ) من الغرفه ولم تصمد امام كتاحة ( تاج السر ) العاصفة في واحد قال ليه يا تاح السر بهجة دي مشت …!! حتقعد تكمل البهجه دي معانا ولا تلحقا ……وفقعوها ليك ضحكة كلهم، تاج السر قال ليهم …منو معاي ؟؟؟ رد عليهو واحد …قال ليهم معاك ( كرومة ) …!!والقرقرابة دورت يازووول ضحك جدا …
هنا ( تجتوج ) قال ليهم هسا إنتو بتعرفوني ….!؟؟؟ قالو ليهو ما بنعرفك والله …..ممكن نتعرف …..!؟؟؟ بس لقاها ليك فرصة …قال ليهم أنا ( سرور ) …!!وفقعا ليك، وقال ليهم أغني ليكم إنت بدر السما في صفاك …..!!

( خلاهم يتلفتو قال ليهم أها يا جماعة بركة بالشوفة العفو والعافيه ودعتكم الله والرسول أجمل حاجه في تطبيقكم دا إنو صوت بس، السوط بركة النبي اليمعطوكم بيهو واحد ورا التاني يا عطاله يا هاملين …قولو اميين …

زووول قادر يرد مافي …!! يبدو انو كتاحة تاج السر وصلتم

قال ليهم وساكتين مالكم من قبيل ما كنتو بتردو ردتكم الحيطة يا وهم ….!!
وانت يا ( أب رويس ) زي غتاية الكورة دا ….من وين اللخو …!!؟؟ وانت يا أبو طاقية عامل فيها شاعر مش كدا
واختنا أم جبهة ناطة ….كيف تمام ….!!

وقبل ما يطلع قال كدا ولفحم ليك قال ليهم وبالمناسبة دي .. ( عسكرية بس ) …!!
(أها دي انتهت منهم ) …!!التطبيق لما اتهزا) وغادر تاج السر …..وسره معه
وبهجه اعتزلت مواقع التواصل الاجتماعي
غايتو جعفر كتلني بالضحك …ولو عندك أي سر عايزو يصل لكل الناس عليك بجعفر
ولو دايرو يصل لأكبر شريحة ممكنة قول ليهو الكلام دا سر يا جعفر …والله هلا 96 …ماتوصلوا زيو ….!!
( تاج السر ) كاتب بوست في الفيس بعد الحادثة دي بي يوم: البهجة في عينيك فسر عليك الله، بهجة بتكون ماتت ، تاج السر دا غايتو استراتيجي خلاص ..بذكرني زول كدا ياخ
+ (مما وصلتني اليوميات دي بواتساب وانا اضحك وقلت أمتعكم بإبداع الطيب المدهش وسامحته لأنه شال حسي “جعفر”).