نبقى مع هناء ابراهيم.. الأخلاق واسم الجد

كتب: جعفر عباس 

.

في واحدة من بيوتات الفيسبوك الاستشارية كتب أحدهم مشكلته، المشكلة حينئذ أنه يحب فتاة وانه كان ينوي الارتباط بها لكنه أكتشف أن اسم جدها ( محرج شويتين) وأن أهله استحالة يوافقوا على زواجه من فتاة جدها بهذا الاسم. سألوه فيم يحتاج اسم جدها؟! وأن هذا الاسم يستخدم فقط لحظة العقد والناس ح تاخد ضحكتها وتنسى الموضوع..

هذه تقريباً آخر صيحات وتقليعات فك الارتباط.. أهم حاجة الأخلاق واسم الجد ولون القميص..

وهسه شربنا الشاي..

حبوبة جيرانا ذات عملية عيون.. بعد أن تم تحضيرها للعملية جاء الدكتور وأخبرهم أن هناك مشكلة في اسم (البيشن) حيث ان اسم جدها مختلف عن ما هو في الفايل..عصبت حبوبة جيرانا وزهجت وقالت له بكل ما أوتيت من حسم وجدية : أقول ليك حاجة… عمليتك دي ذاتي ما دايراها أديني قروشي جاي.. اتفرجتوا؟! قال لها الدكتور: اسم جدك الفي الفايل دا يتعدل وأنا أعمل ليك العملية من عيوني ديل..لتقول له: اسم جدي مالو ومال عيوني؟ داير بيهو شنو إسم جدي؟ داير ترث معاي طين؟! اتفرجتوا تاني؟! طبعآ إستحاله يقدر يقنعا…حبوبة جيرانا وأنا بعرفا…ثم إنتي من زمن الطين؟ هي وين الزراعة دي؟

أقول قولي هذا من منطلق دور الجد في أوراق البني آدم.. وإن كان عن نفسي أنا شخصياً: جدي في الهوى جدك.. وشيل عيونك عني

لدواعٍ في بالي

*****

ذات يوم كان أحد الشباب قد قدم إلى منطقتنا من أجل تقديم واجب عزاء … وشاهد تلاتة بنات (شاقات الحلة عصرية) فقال لصديقه (معليش اااي أنا جاييكم في بكاء واي حاجة لكن والله دايركم تخطبوا لي البت الـ لابسه توب دي) فقال له (أبشر)…نظم له أصدقاؤه لقاء مع أسرة البنت والبارد والكيك والشاي وجلست العروس لرؤية العريس الذي أخبروها في الموجز التعريفي أنه مُرطب وكريم وأخو أخوان ويشجع ريال مدريد ويستمع إلى أحمد المصطفى وجنات ونانسي عجرم وضليع في الليدو والبلايستيشن..

وهسه شربنا الشاي…

كان العريس يرتدي لهذا اللقاء جلابية عنيفة وشال ومركوب نمر أصلي… وكانت العروس لديها مشكلة نفسية مع هذا النوع من (الجزم) فأخذت تنظر للعريس وكلامه ولا تجد فيه عيباً وتنظر إلى جزمته تصاب بطمام حاد ونفسيات… (زاد المركوب بله) أنه لم يقم بحلاقة شعره وإختيار قصة تناسب موعده الأول معها..قالت لهم بالحرف الواحد بعد أن رفضته رفضاً باتاً (والله العظيم من شفت جزمتو دي أبيتو… وكمان ما حالق🤨 دا استهتار شنو دا🤨 زول جاي يقابل خطيبتو أول مرة وما يحلق شعرو😏 حاول العريس أن يقنعها بشخصيته وأن يبذل لها الذهب والمال لكنه فشل في ذلك و ظل تأثير (الجزمة) قائماً وعائقاً..قال لها أخيها : (إنتي الجزمة دي قايلاها هينه… أقسم بالله نحن بنوصي ليها وبنرسل ليها من الجنينه ونيالا)..

وقال لها عمها متصلاً من خارج البلاد : (يا بتي حلاقة شنو ال أبيتي عشانها الراجل ؟ سوقي إنتي الصالون أحلقي ليهو بي 20 جنيه) 20 جنيه (بي التوقيت القديم) لكنها (حلقت) للموضوع بأكمله..

الناس في الغالب لا يفهمون أسبابك النفسية القوية.. ونانسي عجرم قالت ليكم في حاجات تتحس، و…….(جزمتي) المست غرورك.. لدواعٍ في بالي.

(هناء إبراهيم تشارك في إعداد برنامج “على سبيل الجمال” الرائع، الذي تقدمه الشاعرة نضال الحاج التي شقت بموهبتها الضخمة طريقها الى تلافيف القلوب والعقول في الفضائية السودانية، ونضال مثل هناء تعاني من جنون العبقرية، وإذا كانت هناء قد وضعت بكالريوس الهندسة تحت المخدة ونالت بكالريوس الآداب، فإن نضال وضعت شهادتها القديمة في المشلعيب ودخلت كلية الطب وستصبح دكتورة بعد سنة ان شاء الله).

واصلوا الدعاء لهناء: ان شاالله تجن وتزيد في الجن، وأن تظل “تواري اللو”، وأن تتخصص نضال الحاج في طب النفس كي تريحنا من علي بلدو الذي اتهم الرجال بانعدام الرومانسية.