لن تجد لا (999) ولا تسعة (333)!

بقلم : محمد الطيب الأمين

* كل صاحب بصر وبصيرة يعرف أن ما يحدث في السودان هو شيء مخطط له بعناية فائقة جداً.
* تخطيط فيه ذكاء وحقد وخيانة كبيرة .
* ولعل واحدة من أكبر كوارث الكيزان إنهم يستخدمون الذكاء دوماً في أشياء لا تصب في صالح الوطن والمواطن.
* يستخدمون الذكاء والخبث في السرقة والفساد ونهب موارد البلاد.
* إذا أراد الكوز أن يصيبك بضرر فذلك لا يكلفه سواء (ساعة تفكير) ومن بعدها يحشد البلطجية وينفذ أحقاده تجاهك .
* هم بارعون في السرقة والفساد والخراب .
* يساعدهم على ذلك حقد دفين وحسد تاريخي.
* (٣٠) سنة في الحكم وعندما سلط عليهم الله الشعب ونزع منهم الملك زاد الحقد عندهم والحسد.
* وضعوا نصب أعينهم (سوريا) أنموذجاً، فطالما هم خارج الحكم يبقى لازم نبقى زي سوريا.
* يا يحكمونا هم ويا نبقى زي سوريا.
* بالبلدي كده (يا فيها ويا نطفيها).
* ولذلك تجدهم الآن يفعلون كل ما من شأنه أن يقود البلاد إلى الهواية.
* يسعون للفتنة في كادوقلي والجنينة وبورتسودان والخرطوم.
* دايرنها تولع .
* لو عندكم عرس في البيت وجا واحد من أولاد الحلة (شاغل) بت من بنات الحلة لو في اللحظة دي في (كوز) حاضر ممكن يدخل لإشعال الفتنة حتى يتحوَّل العرس إلى بيت عزاء.
* فهؤلاء ريحة الدم الحرام عندهم أطيب من ريحة (الكلونيا) والعطور الباريسية الغالية جداً .
* يريدون أن يحوِّلوا السودان إلى بركة دم .
* هذا المخطط يجب أن نكون واعيين ومدركين لحجمه.
* لا تظن إن (٣٠) سنة انتهت هكذا .
* لا والله .
* كلنا سمعنا التسجيلات السرية للحركة الإسلامية التي بثتها قناة العربية .
* كلنا شفنا وعرفنا الناس ديل بفكروا كيف وبخططوا كيف؟
* كانوا يفكرون بهذه الطريقة الدموية والحاقدة وهم في السلطة ففي ماذا يفكرون الآن وهم بره السلطة؟
* يفكرون في حرق السودان وتفكيكه، يفكرون في الاغتيالات وإشاعة الفوضى واستباحت الدماء .
* عشر سنين لقدام سيهددون الأمن والأمان.
* سيجربون عدداً من الأسلحة، جربوا سلاح (الزحف الأخضر) وفشل .
* سيكون هنالك سلاح الفوضى والموت والفتنة .
* ما تظن أنو الجماعة سقطوا والقصة انتهت.
* والله العظيم القصة يادوب بدأت.
* الفات هو الأسهل والقادم هو الأصعب.
* لو لم ننتبه ونصحى سيكون الوضع أسوأ.
* لازم نحن كشعب نترك الفوضى ويجب أن ننضبط.
* نخلي العبط وقلة الأدب عشان ما نفتح باب يدخل عبره هؤلاء الحاقدين .
* ما تبقى بتاع فوضى .
* انتبه وأقفل أي باب بجيب الريح .
* ما تبقى لينا أنت الباب البجيب الريح .
* الشعب ده لما طلع في الثورة العظيمة ما طلع عشان نشرب ويسكي في شارع النيل ولا عشان نشرب بنقو في الجامعة ولا عشان البنات يخلفن رجل فوق رجل ويشرب شيشة تحت الشجر .
* نحن طلعنا عشان وطن اتسرق .
* وبتوفيق من الله رجعنا الوطن المسروق .
* طيب بعد رجعنا الوطن يفترض نحميهو ونبقى عليهو عشرة ولا نقعد نسكر ونتهابل؟
* نحمي الوطن والثورة ونترك الكواريك والفهم الغلط للمدنية .
* الخطر القادم أكبر وأصعب من لقمة العيش.
* الخطر القادم سيكون أعلاه حريق السودان، وأدناه عودة الكيزان بالقوة .
* ما تحلف بالله وتقول لي ديل انتهوا .
* ما تغش نفسك .
* أقسم بالله قاعدين وشغالين في مخطط يحرق السودان وجميع ما فيه .
* اضبط نفسك وخليك واعي وفاهم وأقبل بالشرطة والجيش .
* ما تخسروا الشرطة والجيش .
* كلنا عندنا ملاحظات عن أداء الشرطة قبل السقوط وبعده .
* لكن البلد بدون أمن وقانون ما بتمشي .
* الموت والقتل سيكون جوه الخرطوم .
* ولن تجد لا (999) ولا تسعة (333) .
* خليك واعي .
* ودي ثورة وعي .
* نطالب بتطهير الشرطة والجيش من الكيزان وبالمقابل نحن نحترم الشرطة ونمكنها من فرض القانون .
* كيف نحارب كل الأجهزة الشرطية والأمنية والجيش، كيف نحاربهم والكيزان (7) ملايين شخص، قاعدين لابدين وفي أيديهم سلاح مدفون تحت الأرض ومنتظرين ساعة الصفر .
* هيكلة الشرطة والأمن والجيش ضرورة ولكن بالمقابل نحن لازم نحترمهم عشان خاطر البلد .
* المدنية فهم ووعي وأدب وذوق .
* بلاش فوضى ومظاهر سالبة .
* أنت لما تعمل فوضى وقلة أدب وجوطة بتساعد الكيزان في شغلهم المخطط له .
* ما تساعدهم.. خلينا ننضبط ونفرض القانون وننتظر حق الشهداء .
* البلد كده ما بتمشي والحريق لن يسلم منه أحد.
* والسودان هو ليس الخرطوم البيحصل في الجنينة بهبشنا كلنا وكذلك بورتسودان وكادوقلى.
* أصحوا فالقادم أصعب .
* و..و..
* واللهم إني بلغت فاشهد.