ما كيزان لكن جرادل !!

بقلم : محمد الطيب الأمين

* مثل السيئات .. (الأزمة في بلدنا تنجب أزمة أخرى) .
* أو أن السودان الحبيب أضحى مثل (صندوق المناديل)، تجر مشكلة تظهر ليك مشكلة .
* بتنا في دوامة من الأزمات والصعوبات والعثرات والضيق .
* صفوف وصعوبات في كل حاجة .
* تعاني عشان تلقى قروش، بعد تلقى القروش ح تعاني عشان تشتري حاجة تأكلها .
* صعوبة في الحصول على القروش ومعاناة في الحصول على الخدمات و(اللقمة) .
* بحقك ح تتعب عشان تلقى .
* الحصول على الرغيف يحتاج توفيق رباني ودعوات من الوالدة وذات الشيء البنزين والجاز والمواصلات وغيرها من الأشياء .
* لا أحسب أن كل هذا الذي نعانيه ونشكو منه جاء (صدفة) .
* هو عمل مرتب له ولكن نحن ساعدنا الذين رتبوا .
* هنالك من يعمل ليل نهار من أجل أن تتطاول الصفوف وتزيد المعاناة .
* هذا معلوم بالضرورة لأن الكيزان أمنياتهم أن يحرق السودان بمن فيه .
* ولكن .
* نحن كشعب سوداني أصبحنا نتكسب من الأزمات .
* أصبحنا نستثمر في الأوجاع والظروف .
* عند الأزمات تجدنا نظهر أسوأ ما فينا .
* جشع، حقد، أنانية، استغلال، استنكاح و.و.
* والضمائر في إجازة مفتوحة .
* والمشكلة في البلد هي مشكلة ضمير .
* غاب الضمير وبقينا كلنا كيزان .
* الآن نحن كشعب بنساعد في الكيزان وبنعمل حاجات تدعم موقفهم .
* الزول البهرب الدقيق .. (سوداني) .
* البهرب البنزين .. (سوداني) .
* البتلاعب في أوزان الرغيف .. (سوداني).
* الببيع جالون البنزين بي (400) جنيه .. سوداني .
* البكب في رطل اللبن كوز موية .. (سوداني) .
* البيخلط السكر وبيخزنو جوار إستاد المريخ .. (سوداني) .
* بتاع الحافلة البينتظر الزحمة وبيجي يقول الراكب بي (70) جنيهاً .. (سوداني) .
* الحقيقة نحن كعبين جدًا .
* بننتظر الأزمة عشان كلنا نستفيد .
* كل همنا نشمت ونسخر ونضغط على بعض .
* حتى مدني عباس مدني لما قال بيحل أزمة الرغيف في (21) يوماً، قعدنا نحسب ليهو ونسخر منو .
* بدل ما نساعدو ونطمنو حسبنا ليهو الأيام ولما تمت المعدودة ضحكنا فيهو .
* ضحكنا وفي الحقيقة نحن بنضحك على أنفسنا .
* عرفنا الكيزان مستفدين من الأزمات ودايرننا نقول (الروب) .
* طيب أنت ما كوز البخليك تتحدى مدني عباس مدني شنو؟
* البخليك تتمنى أزمة البنزين تتواصل شنو؟
* البخليك تخزن سكر شنو؟
* البخليك تهرِّب دقيق شنو؟
* أنت معاهم ولا معانا؟
* أنت كوز ولا ما سوداني ولا ما عندك ضمير ولا شنو؟
* بتاع فرن قافل الفرن (6) أشهر، وطوال هذه الشهور يومياً بيستلم حصة الدقيق الخاصة بالفرن .
* بيستلم حصة الدقيق وببيعها سوق أسود والفرن قافل.
* وأمثال هذا لا حصر لهم .
* لشنو يعني؟
* داير تبقى غنيان على حسابنا؟
* بتخزن في السكر عشان تعمل أزمة في رمضان .
* هل أنت ضامن إنك تلحق رمضان؟
* بستفيد شنو لما يكون الشعب بيعاني؟
* أصبحنا نتململ من حمدوك ونحن في الحقيقة ما عملنا حاجة لحمدوك .
* الآن نحن بنساعد في الكيزان أكثر من مساعدتنا لحكومة حمدوك .
* كلنا بقينا مصلحجية بنفتش للمصلح الشخصية .
* كلنا .. شعب وحركات مسلحة وكلو شغال لنفسو .
* وده الدايرنو الكيزان .
* الكوز يسعد ويفرح كلما يشوف صف رغيف .
* الكوز يصفق ويضحك كلما يشوف صف بنزين .
* مصلحة الكوز كل حاجة تكون صعبة وبالصفوف .
* بل إن مصلحة الكوز أن نصبح مثل سوريا واليمن وليبيا .
* انت مصلحتك شنو؟
* ما في مشكلة .. من حقك انتقد حمدوك وانتقد مدني وانتقد الحكومة كلها لكن كمان حاول ساعد .
* لو ما ساعدت ما تهرِّب وتخزن عشان ما تزيد الأزمة .
* أي زول بيهرِّب دقيق أدوهو طلقة .
* أي بتاع فرن ما شغال زي الناس ارموهو في السجن .
* أي زول بيتلاعب وداير يبقى رجل أعمال على حساب أوجاعنا احسموهو بالقوة والقانون .
* دقوهم وحاكموهم وارموهم في السجون .
* يا نعرفك كوز عديل ويا كمان تبقى ود بلد عندك ضمير وتساعد .
* الضيق الحاصل ده سبب ناس ما عندها ضمير مستفيدة من الوضع ده وللأسف هم ليس كيزان .
* الكيزان الفيهم اتعرفت ونواياهم واضحة لكن المشكلة في الكيزان الهم أصلاً ما كيزان .
* مشكلتنا في الكوز الما كوز .
* سوداني لكن رابط ضمير كوز .
* وفي كل الأحوال (ضل الحرية والتغيير ولا المؤتمر الوطني) .
* نسأل الله أن يعين الجميع ويلطف بهذا البلد .
* و..و..
* والله في .